SINADURAK
Ikasleok ez ditugu garai errazak bizitzen ari. Egitura eraldatzailea izan beharko litzatekeena, subjektu askeak sortu beharko lituzkeenak, ez da izaten ari, aitzitik, hezkuntza sistema urteak daramatza krisi egoera honetatik atera ezinik, eta ez dirudi hobera joango denik.
Argazkia: Ahotsa
Baina, egungo Sistema kapitalistaren zutabe nagusietako bat izanda, nola ez da ba krisian egongo? Ikasleak denbora asko daramagu krisi honen ondorioak pairatzen, eta ez gaude prest honekin jarraitzeko, egungo hezkuntza sistemarekin apurtu eta Euskal Herrirako hezkuntza sistema propioa eraikitzeko momentua iritsi da. Hasieratik esan bezala, egungo hezkuntza sistema ez da egungo sistematik at koka dezakegun instituzioa, kontrara, funtzio zehatz bat jokatzen du, Euskal Herriaren kasuan, Espainiar zein Frantziar estatuen proiektuak gizartean barneratu eta hau betikotzea.
Horrela, Euskal Herriko ikasleok, arazo estrukturalez osatutako hezkuntza sistema batean murgilduta gaude. Gure herriaren ukazioan oinarritzen den hezkuntza jasotzera behartuta gaude, hezkuntza propioa edukitzeko ukazioa, euskaraz ikasteko ezintasuna, Euskal Herrira egokitutako curriculum baten eratzearen ukazioa…
Bidegabekeria guzti hauen aurrean, borroka independentista heziguneetan piztea ezinbestekoa dela diogu, gure borrokaren erdigunean kokatuz eta ikasleen artean balore independentistak zabalduz.
«Horrela ulertzen dugu guk Hezkuntza Sistema Propioaren aldarria, funtsean, gure herriaren beharrei erantzungo dion hezkuntza sistema baten aldeko borrokatik jaiotzen dena»
Beraz, ezinbestean Euskal Herriak independentzia behar du gure neurrira egongo den Hezkuntza Sistema Propio bat lortzeko. Baina, zer aukera ematen dizkigu hezkuntza sistema propioak herri bezala? Hasteko, gure behar soziokulturaletara egokitutako euskal curriculuma osatzea ahaleginduko zuen, zeinetan euskara eta euskal historia funtsezko ardatzak izango liratekeen.
Gaur egun, euskararen irakaskuntza oso mugatuta dago eta kontuan hartuta gure herria hiru lurralde administratiboetan zatituta dagoela, oso egoeradesberdinetan aurkitzen da. Honek ez du baimentzen euskara hizkuntza bezala garatu eta gure gizartean zabaltzea.
«Hezkuntza sistema propio batez, beraz, hizkuntza-murgiltze osoa bermatuko luke hizkuntzaren etorkizuna bermatuz»
Gainera, gure herriaren historiaren zabalpenerako ezinbestekoa zaigu hezkuntza sistema propioa. Gu ezagutzen dugu inor baino hobeto gure herriaren historia, eta hezkuntzatik ere horren aldeko hautua hartzeko ordua iritsi da.
Ezin ditugu aipatu gabe utzi ikas baldintza duinak. Enpresa pribatuak gero eta kabida handiagoa dute hezkuntza sisteman, gure etorkizuna modu zuzenean enpresa pribatuetako lan indarra izatera bideratzen gaituztelarik, balore indibidualistak eta lehiakorrak zabalduz, balore kolektiboak alde batera utziz eta ikasleon eskubideak hezkuntza prozesuaren erdigunetik kenduz.
Horrela, ikasleon ikas baldintza duinen kaskartzea geroz eta agerikoagoa zaigu, hitz politez betetako hezkuntza sistemak gure eskubideak zapaltzen dituelarik, paradoxikoa ezta?
«Hezkuntza sistema propio batek gure herriaren errealitate ekonomiko eta sozialarekin bat datorren plan bat baimenduko luke, bertako publikoa indartuko lukeena»
Ezkerretik eta independentismotik harrotuko den olatua sortzera goaz. Hegemoniak irabazi eta Euskal Herrirako behar dugun hezkuntza aldarrikatuko duena. Momentua da, beraz, ikasleria aktibatu, balore independentistak zabaldu eta Hezkuntza euskaldun, feminista, publiko, komunitario eta nazional baten alde borrokatzeko.
