SINADURAK

Gerla adierazpena

Macron presidenteak gerla adierazpen baten bidez adierazi ditu Koronabirusaren pandemiari aurre egiteko neurriak. Gerlan omen gaude. Setio egoera sanitarioa ezartzea deliberatu dute, oraingoz bi hilabete iraungo duena. Gobernuak eskuak libre ditu ustez pandemiari aurre egiteko beharrezkoak diren neurriak oro hartzeko.

Pandemia bati aurre egiteko gerlaren terminologia erabiltzea deigarria da. Munduaren gobernantza eredu jakin bat irudikatzen du, beti ere ikuskera baten zerbitzura. Gerla adierazpena beste Estatu bati zuzendu dakioke, edo etsai fisiko bati, hots erakunde bati. Haatik, nekez suntsitu daiteke birus bat gerla mekanismoen edo armen bidez.

Osasun zerbitzuen pribatizazioa

Koronabirusak kutsaturiko herritarren kopurua egunetik egunera gero eta handiagoa izanik, osasun sistemaren gaineko presioa izugarria izaten ari da eta bizitza asko daude jokoan.

Pandemia bati aurre egiteko, azken hamarkadetan finantza irizpide hertsiei jarraituz Europako Estatuek metodikoki desegin eta pribatizatu dituzten osasun zerbitzu sendoak behar dira. Biziak salbatzeko eta birusei aurre egiteko medikuak, erizainak, ospitalak, osasun tresneria eta medikamentuak dira ezinbestekoak. Gaur egun, tamalez, falta zaizkigunak.

Osasun zerbitzuak merkatuaren legearen presiopean birmoldatzeko hartu diren erabaki politikoen albo kalteak ari gara pairatzen. Sortzetik heriotzerainoko ibilbide osoa etekin iturri bilakatzeko hautuaren emaitza dugu hor, kezkagarria bezain mingarria.

Sistemaren deflagrazioa?

Koronabirusa historia azkartu eta aldatzen duten ustekabeko eta aurreikusi ezineko elementu horietarik bat izan daiteke. Katalizatzaile gisa, pandemia sistemaren zentzugabekeriaren adierazgarri bilakatzen ari da. Egin behar denaren eta egin behar ez denaren adibide perfektua da.

Munduko herri aberatsenek arma eta gailu sofistikatuenak asmatzen eta ekoizten dituzten une berean ez dira gai beraien herritarrei pandemia bati aurre egiteko oinarrizko baliabideak eskaintzeko. Agintariei kontuak eskatzeko tenorea etorriko da konfinamentu egoera bukatuko delarik.

Krisiak onena ekar dezake txarrena bezala. Mugarri bat izanen da, atzera bueltarik gabekoa. Estatuek tentazio handia izan dezakete pandemia berrien mehatxuaren beldurra instrumentalizatu eta herritarren kontrol sistema zorrotzak indarrean atxikitzeko.

Aldiberean, sistemaren mugak sekulan baino ageriago uzten ditu pandemia berri honek. Konfiantza gehiegi ezarri da globalizazioan, merkatu-ekonomian. Ezin daiteke onartu merkatuak gure bizitzari buruz erabaki dezan. Bidebanatze baten aitzinean gaude. Bizitza ala kapitala, ez dago beste hauturik.